ସ୍ବର୍ଥପର କିଏ?

ପୁଅକୁ କୁଲେଇଲ ନେଇକି ଯିବା ସାତ ଥର ହେଇ ଗଲାଣି l  ପୁଅ ହାତ କେମିତି ଭାଙ୍ଗିଲା ତାହା ଯେ ଆଉ ଗୋଟେ କାହାଣୀ. l ସେକଥା ଆଉ କେବେ lଆଠଗଡ ର କୁଲେଇଲ ଠାରେ ହାଡ ଭଙ୍ଗା  ଚିକିତ୍ସା ସମସ୍ତଙ୍କୁ ବେଶ ଜଣାଶୁଣା l ଏଥର ଶେଷ ଥର ପାଇଁ ଆସିଥିଲି l ସେଠାରେ ଜଣେ ମଉସାଙ୍କ ସହ ପରିଚିତ ହେଲି l ଆଗରୁ ତ କହିଛି, ମୁଁ ଖୁବ ଶୀଘ୍ର ଅଜଣା ଲୋକଙ୍କ ସହ ମିଶି ଯାଏ l ଏଠାରେ ତ କଥା ଆହୁରି ଅଲଗା l ବେନି ଜନେ ସମ ଦଶା l 

ମଉସାଙ୍କ ଘର ଯାଜପୁର l ବୟସ 60 ହେବ l  ତାଙ୍କର  ଡାହାଣ ହାତ ଟି ଭାଙ୍ଗି ଯାଇଥିଲା ଦୁଇ ମାସ ତଳେ l ଡାକ୍ତରୀ ଚିକିତ୍ସା ପରେ ହାତ ଟି ଅତ୍ୟଧିକ ବିନ୍ଧା ହେବାରୁ ସେ କୁଲେଇଲ ପ୍ରଥମ ଥର ପାଇଁ ଆସିଥିଲେ l ସେଠାକାର ଚିକିତ୍ସା ମୁତାବକ ତାଙ୍କ ହାତକୁ ଟାଣି ପ୍ରଥମେ ସିଧା କରାଗଲା l ଅତ୍ୟଧିକ କଷ୍ଟ ହେତୁ ମଉସା ପ୍ରବଳ ଜୋରରେ ଚିତ୍କାର କରି ଉଠିଲେ l ସେଠାରେ ଚିକିତ୍ସା ରେ ନିହିତ କର୍ମଚାରୀ ଜଣେ ପଚାରିଲେ, " ଆପଣଙ୍କ ସାଙ୍ଗରେ କିଏ ଆସିଛନ୍ତି?" ମାଉସା କହିଲେ ସେ ଏକା ଆସିଛନ୍ତିl 

ପୁଅ ହାତର ଚିକିତ୍ସା ସାରି ଔଷଧ ଆଣି ମୁଁ ବାହାରେ ବସ କୁ ଅପେକ୍ଷା କରି ଥିଲି l  ମଉସା ଜଣଙ୍କ ବାହାରକୁ ଆସି ମୋ ପାଖରେ ଠିଆ ହେଲେ l ସେ ମଧ୍ୟ ବସ କୁ ଅପେକ୍ଷା କରିଥିଲେ l ଏମିତି କଥା କଥା ରେ ମଉସା ନିଜ କଥା କହିଲେ l

ତାଙ୍କର ତିନି ଝିଅ ଓ ତିନି ଜ୍ୱାଇଁ l ଜଣେ ଝିଅ ଏହି ଆଠଗଡ଼ରେ ବାହା ହେଇଛି l  ଦୁଇ ମାସ ହେଲା ହାତ ଭାଙ୍ଗି ଲାଣି l ହେଲେ କାହାର କିଛି ଯାଏ ଆସେ ନାହିଁ l ଭଲ ଯାନୀ ଯୌତୁକ ଦେଇ ଝିଅ ତିନିହେଁ ଙ୍କୁ ବାହା ଦେଇ ଥିଲେ ମଉସା l ଶାଶୂଘର ଚଳଣି ମଧ୍ୟ ଖୁବ ଭଲ l ମଉସା ଗୋଟେ ସିଲେଇ ଦୋକାନ କରି ଝିଅ ମାନଙ୍କୁ ପାଠ ପଢ଼େଇ ବାହା ଦେଇଛନ୍ତି l

ପୁଅ ଟିଏ ମଧ୍ୟ ଅଛି ମଉସାଙ୍କର l ସେ କଟକ ରେ ରହି ଚାକିରୀ କରୁଛି l ତାକୁ ବି ସମୟ ନାହିଁ ଘରକୁ ଆସି ବୁଢା ମା ବାପାଙ୍କ କଥା ବୁଝିବାକୁ l ଷାଠିଏ ବର୍ଷର ବୃଦ୍ଧ ଜଣେ  ଜୀବନର ସମସ୍ତ ସମୟ ଓ ଆୟ ଯାହା ପାଇଁ  ଖର୍ଚ୍ଚ କରି ଦେଲେ, ତାଙ୍କ ପାଇଁ ଆଜି କାହା ପାଖରେ  ସମୟ ନାହିଁ l ନିଜ ପୁଅ ଝିଅଙ୍କ ଠାରୁ ପ୍ରତି ବଦଳରେ ଟିକେ ସ୍ନେହ, ଶ୍ରଦ୍ଧା  ଓ ଯତ୍ନ ଆଶା କରିବା କଣ ଭୁଲ? ସ୍ୱାର୍ଥପର କିଏ? ମଉସା ନା ତାଙ୍କ ପୁଅ ଝିଅ?